حبة الرمان مش هتفلسف كتير .. بس لو عايزين تعرفوا شعبيه شفيق الغير مفهومه دي جت منين .. ااقولكم انا
الحلاق الغلبان اللي كان بيخش له في اليوم عشرين راس وبعد الثورة بقى يخش له عشرة بس فلعن الثورة على اللي عملها لانها خلته غلبان (قوي قوي) بعد ما كان غلبان (بس) وبقى يدعي ربنا إن واحد زي شفيق أو موسي يمسك البلد عشان يضمن العشرين راس ييجوا ليه تاني بدل ما ينتخب حد ما يعرفوش يخليه يقفل محله للابد .. وقيس على كده الوف الالوف من المهنيين والحرفييين والتجار اللي السبوبه بتاعتهم قلت بعد الثورة ..

قطاع كبير من الطبقة المتوسطة اللي كانت حياتها “دمها خفيف” قبل الثورة .. واحد كان عايش حياة هادية مجوز ومخلف وبيشتغل وبيفسح مراته في سينما ويغديها في مؤمن كل خميس وبيسافر الساحل كل سنة .. بعد الثورة حوافزه قلت ومؤمن غلا السندوتشات و مدارس العيال بقت نار والسينمات معادتش زي الأول والمصيف بقى حسب التساهيل .. فيه ناس كده كتير والله … عايشين بالالا ولنفسهم وبس .. واحد زي ده عايز شفيق يرجع عشان حياته اللطيفة الظريفه ترجع من تاني .. ومش هامه بقى إنه كان حواليه الوف خلاهم النظام مستنيين بواقي سندوتشاته أو ألوف تانيين بيستنوا الجنيه اللي هيدفعوا لمسح عربيته غير الملايين اللي بيتمنوا بس قعده على الكورنيش مع حمص شام بدل شاليهات الساحل الشمالي اللي بيطلعها كل سنه ..

سبعين في الميه من الفنانين والفنانات .. والمطربين والمطربات ..و الإعلاميين والإعلاميات .. و الراقصين الراقصات (طبعا مفيش راقصين بس قلتها عشان القافيه) .. خايفين من اي مرشح اسلامي (ابو الفتوح ومرسي) يعكنن مزاجهم الدافي أو يلغي (القبلات الساخنه في الأفلام) فينتخبوا شفيق اللي هيشربهم فخفخينا وبيشجع الفن الراقي وبيرحب - بكل تأكيد – بالقبلات الساخنه ..
(الطريف انه فيه فنانين ومطربين بيأيدوا صباحي بس سبحن الله يا أخي مفيش ولا رقاصه بتأيده مع انه أوسم من شفيق وبيسشور شعره كل مرة و له في ذلك حكم؟؟!)

كل الفاسدين من رجال الأعمال أصحاب الملايين و المليارات وأصحاب الشركات والمصانع وشركات البناء والمقاولات العملاقة و اللي كانوا عايشين في بغدده في أيام مبارك وشغلهم ماشي بإمضاء الوزير وختم السفير عايزين شفيق يرجع لانه هيجيب معاه كل اللي كان بيسهلهم شغلهم من النظام السابق والمرة دي في مناصب أعلى وأكبر كمعاونين لشفيق نفسه .. خايفين من حد زي ابو الفتوح يحاسبهم على كل كبيرة وصغيره ؟ ومرعوبين من ناصرية حمدين ليقولهم من أين لك هذا و يأمم مصانعهم وشركاتهم بين يوم وليلة ..
(ملحوظة :رجال الأعمال دول معظمهم أقنعوا ألوف العاملين في شركاتهم بانتخاب شفيق )

الناس اللي في الشارع واللي معندهاش فيس بوك ولا تويتر ولا يفهموا حاجه في الكمبيوتر و بيعتمدوا على القناة الأولي والتانية وكلام الجرايد وإعلاميو شفيق اللي بيقنعوهم إن شفيق مقاتل ووطني ومحارب و هو اللي هيقضي على الفساد ويخلي البلد تستقر و إن وائل غنيم ماسوني وحمدين ليبرالي كافر وابو الفتوح ارهابي .. كل دول انتخبوا شفيق .. وكان المفروض احنا كشباب بدل ماحنا ملطوعين عالفيسبوك ليل ونهار نشتغل شويه على توعية الناس اللي ملهاش في التكنولوجيا دي …. أو على الأقل كنا نستني على مبارك لحد ما يكمل مشروع حاسب لكل بيت بعدين نخلعه ..

وأخيراً وللأسف أبويا وأبوك .. وأمي وأمك .. اللي خايفين عليا و عليك من الأيام الجايه الي ميعرفوش فيها ايه .. فينتخبوا شر مالوف أحسن من خير غير معروف ..

كل ده ومش عايز شفيق يكتسح يا صاحبي ؟؟!